بـك مـن كــرم حــاتـم وبـك ســطــوة الــزيــر

حييت ياللي لـك مكانـه وتقديـر
يالوافي اللي بالوفـا ذاع صيتـه
بك من كرم حاتم وبك سطوة الزير
شامخ ومرقاب المراجـل رقيتـه
وأنا عضيدك لو تطول المشاويـر
مايفيد بالشـدات علـه .. وليتـه
أبشر بعزك بالظـروف المعاسيـر
من صاحبً يفزع ليامـن نخيتـه
لاهنت يانسل الرجـال المناعيـر
يالشاعر اللـي بالمعانـي عنيتـه
يجي ويلقانـي لضيّقـه تباشيـر
وانا ليا ضاق المدى الرْحب جيته
على الوفا ماهي صداقـة دنانيـر
والطيب ساس ومعدن الرجل بيته
ياسعود ياسعود السعد جيّتك غيـر
مقدارهـا فـوق الثريـا بنيـتـه
عسى فداك اللي جدوده مشاهيـر
وانا أحسب انـه مثلهـم لالقيتـه
كنت أتخّيـل بالسيـوف البواتيـر
صورة مبادي صاحبـي لادعيتـه
وكنت أرفعه وأسمع وصاياه واشير
وعليه لاشفت الخطـأ مارضيتـه
ودارت دواليب الدهـر والمقاديـر
وصحيت من كابوس ليلً سريتـه
الله واكبـر يالنوايـا المغاتـيـر
اللـي زرعتـه بالوفـا ماجنيتـه
لكن عزايـه يالوجيـه المسافيـر
أني على عهـد الوفـا مانسيتـه
مبداي هو مبداي ماقـف وتفكيـر
طبعً ورثته شمت بـه وأحتميتـه
مايلحقه من جـور الايـام تأثيـر
وان ضاق به صدر الخوي مارثيته